Përmbajtja

• Koment
  • Qëllimi
    1. Qëllimi i kësaj dispozite procedurale është përkufizimi dhe përcaktimi i veprimit të “Dorëzimit të kontrolluar”si pjesë e metodës së posaçme të hetimit, kuptimi i dorëzimit të kontrolluar, roli i prokurorit në veprimin e dorëzimit të kontrolluar, përcaktimi i llojeve dhe natyrës së veprave penale për të cilat mund të realizohet veprimi i dorëzimit të kontrolluarnë përputhje me ligjin.
  • Objekti
    2. Objekti i kësaj dispozite është përcaktimi i veprimeve procedurale që ndërmerr prokurori në funksion të kryerjes së veprimit të “Dorëzimit të kontrolluar”, si dhe përcaktimi i nevojës së kryerjes së këtij veprimi me qëllim identifikimin e personave që marrin pjesë në kryerjen e veprës penale, si dhe sigurimin e marrjes së provave që kanë lidhje të drejtpërdrejtë me veprën penale, kur vlerësohet nga organi i hetimit se çdo mënyrë tjetër e marrjes së tyre është e pamundur.
  • Komente për çështje të ndryshme të dispozitës
    3. Dorëzimi i kontrolluar dhe fillesat e zbatimit të tij. Dorëzimi i kontrolluar është një prej metodave të posaçme të hetimit i parashikuar fillimisht në ligjin nr. 8750, datë 26.3.2001, “Për parandalimin dhe luftën ndaj trafikut të substancave narkotike ose psikotrope”. Në nenin 2, paragrafi i dytë i këtij ligjigjejmë përkufizimin ligjor të metodës së“Dorëzimit të kontrolluar”, qëështë përdorur nga prokuroria në bashkëpunim me policinë gjyqësore në hetimin e veprave penale në fushën e narkotikëve. Në këtë dispozitë ligjore është parashikuar se:

    “Dorëzim i kontrolluar” kuptohet veprimtaria e karakterizuar nga përdorimi i metodave gjurmuese hetimore, për të lejuar kalimin në territorin e një ose më shumë shteteve të substancave narkotike ose psikotrope, të prekursorëve ose substancave të tjera zëvendësuese të tyre, të dërguara në mënyrë të paligjshme, të cilat mbahen nën kontrollin e autoriteteve policore të vendeve të sipërpërmendura për të identifikuar personat e përfshirë në kryerjen e veprave penale, të parashikuara në paragrafin e parë të nenit 3 të Konventës së Vjenës të vitit 1988, si dhe në ligjin shqiptar.

    4. Mbështetur në përkufizimin e mësipërm mund të themi se “Dorëzimi i kontrolluar”është një metodë hetimore me natyrë gjurmuese që kërkon bashkëpunimin e autoriteteve gjyqësore të dy ose më shumë shteteve në territoret e të cilëve importohet, tranzitohet apo eksportohet lënda narkotike objekt hetimi. Nëpërmjet përdorimit të kësaj metode të posaçme autoriteti gjyqësor i një shteti lejon kalimin e kontrolluar në territorin e tij të lëndëve narkotike dhe për këtë veprim ai njofton autoritetin gjyqësor të vendit ku do të mbërrijë dërgesa me sende të paligjshme me qëllim identifikimin e personave pritës dhe mbledhjes dhe sigurimit të provave të mjaftueshme në funksion të hetimit. Metoda e “Dorëzimit të kontrolluar”përdoret vetëm kur realizohet sigurimi i kontrollit të plotë e të vazhdueshëm të ngarkesës[1].
    5. Metodat e posaçme të hetimit, nuk janë mjetetipike tradicionale në funksion të hetimit të veprave penale.Besojmë se kjoka arsyet e veta, pasi metodate posaçme të hetimit, vlerësohen si mjete moderne, që kërkojnë zbatimine përdorimit të arritjeve të shkencave të komunikimit, të cilat zhvillimet maksimale i kanë pasur kohët e fundit. Zhvillimete fundit të shkencës së teknologjisë së komunikimit i vijnë në ndihmë metodave të posaçme të hetimit, të cilat kërkojnë përdorimin gjerësisht të regjistrimeve audio, filmimeve, fotove, incizimeve, gjurmimeve apo mjeteve të telekomunikimit që bëjnë të mundur identifikimin e autorëve të vepravepenale ku përfshihet përdorimi i këtyre metodave, identifikimin dhe vendndodhjen në çdo kohë të sendeve të kundërligjshme. Për të kuptuar rëndësinë e arritjeve të teknologjisë në përdorim të metodave të posaçme të hetimit mjafton të përmendim nenin 16 të ligjit “Për parandalimin dhe luftën ndaj trafikut të substancave narkotike ose psikotrope”,i cili parashikon se:

    “Për të siguruar të dhëna, si dhe për identifikimin e autorëve në trafiqet e drogës, punonjësit e SHQLKD-së (Shërbimi Qendror i Luftës Kundër Drogës), në cilësinë e oficerit dhe agjentit të Policisë Gjyqësore, kanë të drejtë të bëjnë interceptime të bisedave dhe të komunikimeve me mjete teknike e shkencore, të bëjnë vëzhgime, fotografime e filmime sekrete, sipas procedurave të përcaktuara në Kodin e Procedurës Penale”.

    6.Arritjet e shkencës së komunikimit marrin një rëndësi të veçantë në këtë rast, pasi ato e bëjnë efektive përdorimin e metodës së dorëzimit të kontrolluar. Siç e përmendëm edhe më lart dorëzimi i kontrolluar është një metodë gjurmimi pasi ajo përdoret vetëm kur organi i hetimit ka realizuar sigurimin e kontrollit të vazhdueshëm dhe të pandërprerë në kohë të ngarkesës së lëndës narkotike. Duke përdorur arritjet e teknologjisë së komunikimit, gjurmimi i pandërprerë mund të realizohet duke vendosur në ngarkesën e lëndës narkotike pajisje elektronike të cilat në çdo kohë japin informacionin e saktë për vendndodhjen e tyre.

    7. Dorëzimi i kontrolluar si metodë e posaçme hetimore. Me qëllim përdorimin e metodës së “Dorëzimin të kontrolluar” edhe për vepra të tjera penale, Kodi i Procedurës Penale me ndryshimet që ai ka pësuar me ligjin nr. 35, datë 30.3.2017 ka shtuar në përmbajtjen e tij në nenin 294/c edhe instrumentin e “Dorëzimit e të kontrolluar” si pjesë e metodave të posaçme të hetimit. Në fakt neni 294/c i Kodit të Procedurës Penale nga njëra anë parashikon kriteret ligjore që duhet të plotësojë “Dorëzimi i kontrolluar” për t’u cilësuar si metodë e posaçme e hetimit dhe nga ana tjetër e njëjta dispozitë procedurale përcakton natyrën e veprave penale ndaj të cilave përdoret “Dorëzimi i kontrolluar” si veprim hetimor. Pra,neni 294/c i Kodit i të Procedurës Penalenuk e kufizon përdorimin e “Dorëzimit të kontrolluar” vetëm në hetimin e veprave penale në fushën e narkotikëve, por këtë metodë e përfshin në rrethin e veprimeve hetimore të cilat mund të përdoren gjatë hetimit të disa veprave penale ku përfshihen edhe veprat penale në fushën e narkotikëve.
    8. Në këtë kuptim themi se “Dorëzimi i kontrolluar” është veprimtaria e karakterizuar nga përdorimi i metodave gjurmuese hetimore për të lejuar kalimin në territorin e një ose më shumë shteteve të ngarkesave të paligjshme, shumave të parave apo të ardhurave të tjera produkte të veprës penale dhe sendeve të përdorura si mjet për kryerjen e veprës penale të dërguara në mënyrë të paligjshme, të cilat mbahen nën kontrollin e autoriteteve policore të vendeve të sipërpërmendura me qëllim zbulimine veprave penale dhe identifikimin e personave të përfshirë në kryerjen e tyre.
    9. Rastet e përdorimit të metodës së “Dorëzimit të kontrolluar”. Përdorimi i “Dorëzimit të kontrolluar”si metodë hetimi në bazë të nenit 294/c, paragrafi i parë i Kodit të Procedurës Penale lejohet kur një veprim i tillë autorizohet nga prokurori që drejton hetimet paraprake mbi bazën e një kërkese të ardhur nga autoritetet e huaja gjyqësore. Autorizimi i prokurorit i mbështetur në kërkesën e ardhur nga autoriteti i huaj ështënjë kriter ligjor i parashikuar nga neni 294/c, paragrafi i parë i Kodit të Procedurës Penaleqë mundëson përdorimin e “Dorëzimit të kontrolluar” si metodë hetimi.
    10. Autorizimi i prokurorit për përdorimin e metodës së“Dorëzimit të kontrolluar” mund të lëshohet prej tij në dy raste të përgjithshme që janë:

                - Identifikimi apo arrestimi i personave të përfshirë në veprimtari kriminale, mundësia e dëmtimit të hetimeve, rrezikimit të sigurisë së personave të tjerë, mundësia e dëmtimit apo humbjes së sendeve që transportohenneni 294/c, paragrafi i dytë, germa “a”. 

    - Zbulimi i veprave penale dhe marrja e provave të nevojshme është i pamundur ose i vështirë për t’u kryer me mënyra të tjera, neni 294/c, paragrafi i dytë, germa “b”.

    11. Identifikimi apo arrestimi i personave në veprimtari kriminale. Përdorimi i metodës së dorëzimit të kontrolluar synon identifikimin dhe arrestimin e personave të përfshirë në veprimtari kriminale me natyrë transnacionale, në rastet kur identifikimi dhe arrestimi i tyre është i pamundur me metoda të tjera. Pamundësia e identifikimit të autorëve të përfshirë në kryerjen e këtyre veprave penale apo e arrestimit të tyre lidhet me natyrën e ndërlikuar të veprimtarisë kriminale, e cila fillon në territorin e një shteti të caktuar dhe mund të përfundojë në territorin e një apo disa shtetevetë tjera.
    12. Në këto kushte kur autoriteti procedues gjyqësor i një shteti konstaton se veprimtaria kriminale e nisur në territorin e tij përfshin një ose disa shtete të tjera, ai e ka të pamundur që të identifikojë apo arrestojë të gjithë personat e tjerë me vendndodhje në shtetet e tjera, ku kryhet e gjithë veprimtaria kriminale, pa kërkuar ndihmë për bashkëpunim me autoritetet proceduese gjyqësore të shteteve përkatëse. “Dorëzimi i kontrolluar” për shkak të natyrës së tij gjurmuese krijon mundësinë e bashkëpunimit të autoriteteve proceduese gjyqësore të vendeve të ndryshme të prekura nga veprimtaria kriminale me elementetransnacionale me qëllimin e përbashkët të identifikimit dhe arrestimit të autorëve pjesëmarrës në këtë veprimtari.
    13. Ky parashikim i referohet një situate hipotetike kur p.sh.brenda dërgesave të lejuara në qarkullimin civil është fshehur lënda narkotike e cila është nisur me agjencispedicionere nga një vend i largët me destinacion përfundimtar vendin tonë. Autoritetet e huaja gjyqësore nëpër të cilat ka kaluar dërgesa brenda së cilës është fshehur lënda narkotike e kanë identifikuar atë, por e kanë të pamundur të identifikojnë autorët e kësaj vepre penale për shkak se ata si pritës të lëndës narkotike ndodhen në vendin tonë. Rrjedhimisht, autoritetet e huaja gjyqësore duke përdorur metodën e “Dorëzimit të kontrolluar” në këtë rast njoftojnë autoritetet gjyqësore shqiptare për lëndën narkotike të fshehur në dërgesën e identifikuar që duhet të mbërrijë në vendin tonë me agjencinë spedicionere. Autoritetet gjyqësore shqiptare pasi sigurojnë dhe vihen në zotërim brenda kufirit tonë shtetëror të lëndës narkotike kanë të gjitha mundësitë për të vijuar më tej hetimin për të identifikuar dhe arrestuar më pas personin ose personat që do të marrin në dorëzim dërgesën brenda të cilës është e fshehur lënda narkotike.
    14. Situata e përmendur më lart i referohet një ngjarjeje të vërtetë e cila është gjykuar në gjykatën e shkallës së parë “Për Krimet e Rënda” Tiranë, ku në shqyrtimin gjyqësor të saj është evidentuar përdorimi i metodës së “Dorëzimit të kontrolluar” midis autoriteteve gjyqësore italiane dhe autoriteteve gjyqësore shqiptare, që në këtë rast përfaqësoheshin nga prokuroria “Për Krimet e Rënda”. Në këtë shqyrtim gjyqësor u gjykuan dy të pandehur të cilët u deklaruan fajtorë për veprën penale të“Trafikimit të narkotikëve” në bashkëpunim,parashikuar nga neni 283/a, paragrafi i dytë i Kodit Penal[2].
    15. Rreziku i dëmtimit të hetimit. Përdorimi i metodës së“Dorëzimit të kontrolluar” ndihmon në hetimin e plotë të një çështje penale, duke mos e dëmtuar hetimin e nisur, nëse do të identifikoheshin menjëherë apo arrestoheshin personat e përfshirë në veprimtari kriminale. Nëse nuk do të përdorej nga organi procedues metoda e dorëzimit të kontrolluar në rastet e parashikuara nga ligji dhe do të veprohej menjëherë me arrestimin e autorëve të veprës penale me natyrë transnacionale, do të ekzistonte mundësia që hetimi i nisur mund të dëmtohej për shkak të ndërprerjes së tij si pasojë e mungesës së juridiksionit penal për të vazhduar më tej hetimet në territorin e një shteti tjetër në të cilin vijon veprimtaria kriminale me qëllim identifikimin dhe arrestimin e personave të tjerë bashkëpunëtorë. Ky parashikim i referohet një situate tjetërhipotetike kur p.sh.autoritetet tona gjyqësore kanë nisur një hetim mbi disa persona të identifikuar të cilët po planifikojnë dërgimin e një sasie lënde narkotike në shtetin fqinj. Hetimet e nisura nga autoritetet tona gjyqësore kanë identifikuar personat që kanë siguruar lëndën narkotike dhe janë vënë në dijeni të planit të tyre për ta trafikuar në shtetin fqinj, ku atje lënda narkotike do të merrej në dorëzim nga disa persona të tjerë të paidentifikuar nga autoritetet tona gjyqësore.
    16. Në këtë rast nëse nuk do të përdorej metoda e “Dorëzimit të kontrolluar” si një instrument bashkëpunimi midis autoriteteve gjyqësore shqiptare dhe atyre të shtetit fqinj, hetimet e nisura do të dëmtoheshin dhe nuk do të ishin të plota. Autoritetet gjyqësore shqiptare do të arrestonin personat në Shqipëri që kishin siguruar, planifikuar trafikimin e lëndës narkotike drejt shtetit fqinj, por nuk do të identifikonin dhe arrestonin pritësit e lëndës narkotike në territorin e shtetit tjetër. Përdorimi i metodës së “Dorëzimit të kontrolluar” në bashkëpunim paraprakisht edhe me autoritetet gjyqësore të shtetit fqinj bën të mundur hetimin e plotë të të gjithë personave që marrin pjesë në kryerjen e kësaj vepre penale në të dy anët e kufijve shtetërorë.
    17. Rreziku i sigurisë së personave të tjerë.Në disa raste mungesa e përdorimit të metodës së “Dorëzimit të kontrolluar” mund të vërë në rrezik sigurinë e personave që janë përfshirë me autorizimin e prokuroritnë kryerjen e veprimeve simuluese ose veprimeve të infiltrimit si pjesëmarrës në një veprimtari kriminale për të cilën ka nisur më parë hetimi. Për shkak të natyrës komplekse të hetimit mund të ndodhë që në metodën e “Dorëzimit të kontrolluar” mund të përfshihen edhe punonjës policie nën mbulim. Kjo situatëështë parashikuar shprehimisht nënenin 2, paragrafi gjashtë, i ligjit “Për parandalimin dhe luftën ndaj trafikut të substancave narkotike dhe psikotrope”,ku është parashikuar se:

    “Punonjës i policisë nën mbulim” kuptohet oficeri ose agjenti i Policisë Gjyqësore, pjesëtar i shërbimit të luftës kundër drogës ose personi i autorizuar prej tyre, që merr pjesë në përdorimin e metodave të "blerjes së stimuluar" e "dorëzimit të kontrolluar", duke fshehur bashkëpunimin me policinë ose cilësinë e tij si punonjës policie.

    18. Në një rasthipotetik, një punonjës i policisë nën mbulim për shkak të një hetimi të nisur për veprën penale të trafikimit të narkotikëve me autorizimin e prokurorit, është lejuar të kryejë veprimin simulues të transportit të lëndës narkotike nga territori ynë në drejtim të një shteti tjetër kufitar me vendin tonë.Po të mos përdorej metoda e “Dorëzimit të kontrolluar”, punonjësit të policisë nën mbulim do t’ i rrezikohej siguria e tij, pasi ai mund të arrestohej nga autoritetet e huaja gjyqësore për veprën penale të trafikimit të narkotikëve. Me përdorimin e metodës së“Dorëzimit të kontrolluar” jo vetëm që nuk cenohet siguria e punonjësit të policisë nën mbulim, por nëpërmjet tij autoritetet tona gjyqësore i përcjellin autoriteteve të huaja gjyqësore kontrollin e lëndës narkotike duke lejuar vijimin e hetimeve nga autoritetet e huaja.
    19. Rreziku i dëmtimit apo humbjes së sendeve që transportohen.Përdorimi i metodës së “Dorëzimit të kontrolluar” siguron sendet e paligjshme që do të transportohen nga humbja ose dëmtimi i tyre. Në ditët e sotme arritjet e shkencës kanë bërë të mundur “tretjen” e lëndës narkotike të kokainës në vajin e palmës. Nëse kjo ngarkesë i nënshtrohet kontrollit doganor të disa vendeve nëpër të cilat ajo do të kalojë do tëekzistonte rreziku që ajo mund të humbiste ose mund të dëmtohej për shkak të natyrës së saj, si rezultat i veprimeve të pakujdesshme të punonjësve të doganave të vendeve të ndryshme gjatë procedurave të kontrollit apo edhe si rezultat i dyshimit të lindur nga autorët e kësaj vepre penale se ata janë nën hetim.
    20. Në këtë situatë, përdorimi i metodës së “Dorëzimit të kontrolluar” që në këtë rast lidhet me zëvendësimin e ngarkesës ku gjendet e “tretur” lënda narkotike me një ngarkesë tjetër të ngjashme pa pasur lëndë narkotike në përbërjen e saj lejon autoritetin gjyqësor të sigurojë lëndën narkotike nga humbja ose dëmtimi i saj. Më tej, autoriteti gjyqësor në vijim të përdorimit të metodës së “Dorëzimit të kontrolluar” i paraqet një kërkesë vendit ku do të transportohej ngarkesa për vijimin e hetimit të nisur duke e shoqëruar këtë kërkesë edhe me provat e siguruara prej tij.
    21. Në rastin e përmendur më lart, metoda e “Dorëzimit të kontrolluar” ndihmon hetimin jo vetëm në drejtim të sigurimit të lëndës narkotike nga humbja ose dëmtimi i saj, por njëkohësisht kjo metodë ndihmon në zbulimin e veprës penale dhe sigurimin e provave për vendin ku do të mbërrinte përfundimisht lënda narkotike. Nëse nuk do të ekzistonte metoda e “Dorëzimit të kontrolluar”, si një instrument bashkëpunimi midis dy autoriteteve gjyqësore të vendeve të ndryshme, autoriteti gjyqësor i vendit ku do të mbërrinte ngarkesa me lëndën narkotike të “tretur” në vajin e palmës nuk do të kishte mundësi të zbulonte veprën penale dhe autorin e saj, si dhe nuk do të kishte mundësi të siguronte provat e nevojshme që në këtë rast ishte vaji i palmës brenda të cilit ishte e “tretur” lënda narkotike, pasi ajo ishte hequr për nevoja të sigurimit nga autoriteti gjyqësor i vendit që kishte nisur hetimin. Me anë të metodës së“Dorëzimit të kontrolluar”,si një instrument bashkëpunimi, autoriteti gjyqësor që nisi hetimin, jo vetëm që ka zbuluar ekzistencën e veprës penale, por ka siguruar edhe provën kryesore të kësaj vepre, që është lënda narkotike,e cila, më pas (jo fizikisht), me anë të kërkesës për “Dorëzimin e kontrolluar”dhe akteve të tjera procedurale shoqëruese i dërgohen vendit ku do të vijojë hetimi penal.

    22.“Dorëzimi i kontrolluar” dhe ngarkesat e paligjshme. Neni 294/c, germa “a” i Kodit të Procedurës Penale parashikon natyrën e veprave penale te të cilat lejohet zbatimi i metodës së “Dorëzimit të kontrolluar”. Në kategorinë e veprimtarive kriminale ku lejohet përdorimi i metodës së “Dorëzimit të kontrolluar” përmendim veprat penale të mëposhtme:

    - Transport i paligjshëm i lëndëve narkotike, armëve, sendeve të vjedhura,materialeve eksplozive ose bërthamore, materialeve radioaktive.

    - Shumave të parave dhe të ardhurave të tjera produkte të veprës penale.

    - Sende të përdorura si mjet për kryerjen e veprave penale.

    23.Rasti i parë ligjor, lejon përdorimin e metodës së“Dorëzimit të kontrolluar” për sende që janë të ndaluara nga rendi ynë juridik për t’u transportuar në mënyrë të ligjshme. Në këtë rastpërdorimi i metodës së “Dorëzimit të kontrolluar”synon parandalimine rasteve tëtransportit të paligjshëm të sendeve, regjimi i ndalimit të qarkullimit të të cilave, është i parashikuar shprehimisht në dispozitat konkrete të Kodit Penal. Kështu, Kodi Penal në disa dispozita të tij ndalon transportimin e paligjshëm të lëndëve narkotike, armëve, sendeve të vjedhura, materialeve eksplozive ose bërthamore si dhe materialeve radioaktive.

    24. Rasti i dytëligjor lejon përdorimin e metodës së“Dorëzimit të kontrolluar” të sendeve që janë produkt i veprave penale. Sendet të cilat mund të rrjedhin nga një krim ose veprimtari kriminale jo domosdoshmërisht janë sende të ndaluara nga rendi ynë juridik në qarkullimin e lirë të tyre. Ato mund të jenë sende të lira për qarkullim, por për shkak se janë produkt i veprave penale rendi ynë juridik e ndalon qarkullimin e tyre. Ekzistojnë një kategori veprash penale të cilat krijojnë dhe “prodhojnë” produkte dhe sjellin fitime të kundërligjshme.
    25. Fitimet që sjellin veprat penale në fushën e narkotikëve, në fushën e prodhimit, tregtimit dhe trafikimit të armëve, trafikimit të qenieve njerëzore me qëllim shfrytëzimin e tyre, në fushën e veprave penale që i drejtohen pasurisë etj., mund të arrijnë shifra të konsiderueshme të krijimit të produkteve që rrjedhin nga këto veprimtari të kundërligjshme. Këto përfitime krijojnë një mirëqenie të pamerituar dhe në kundërshtim me ligjin për personat që i kanë krijuar dhe siguruar ato nëpërmjet veprimtarisë kriminale. Sigurimi i përfitimeve të tilla që rrjedhin nga një veprimtari kriminale dhe vënia e tyre në qarkullimin civil nëpërmjet transaksioneve të ndryshme me qëllim shtimin e përfitimeve ose fshehjen e origjinës së paligjshmërisë së tyre, zgjerojnë zinxhirin e veprave të tjera penale të parashikuara nga dispozita të veçanta në Kodin Penal. Raste të tilla përfshihen në fushën e veprave penale të “riciklimit të parave ose të pastrimit të produkteve të veprave penale”.
    26. Me qëllim forcimin e luftës kundër veprave penale në fushën e “riciklimit të parave ose të pastrimit të produkteve të krimit” neni 294/c i Kodit të Procedurës Penalelejon përdorimin e metodës së “Dorëzimit të kontrolluar” në drejtim të transportit të shumave të parave ose të ardhurave të tjera që janë produkte të veprës penale.
    27. Rasti i tretë ligjor i referohet situatës kur përdorimi i metodës së “Dorëzimit të kontrolluar” mundëson identifikimin dhe gjurmimin e sendeve që në transportin apo lëvizjen e tyre shërbejnë si mjete të kryerjes së veprës penale. Vendosja e pajisjeve të gjurmimit në sendet e transportit, të cilat dyshohen se po përdoren si mjete për kryerjen e një vepre penale, mund të realizohet duke përdorur metodën e “Dorëzimit të kontrolluar” në bashkëpunim midis dy autoriteteve gjyqësore që u përkasin vendeve të ndryshme.
    28. Zbulimi i veprave penale dhe marrja e provave të nevojshme. Metoda e “Dorëzimit të kontrolluar” mund të përdoret edhe në raste të tjera hetimore përtej atyre të cituara më lart.Kjo metodë zbatohet për zbulimin e veprave penale dhe marrjen e provave të nevojshme kur është e pamundur ose i vështirë për t’u kryer me mënyra të tjera.Neni 294/c, paragrafi i dytë, germa “b” i Kodit të Procedurës Penalelejon përdorimin e metodës së “Dorëzimit të kontrolluar” për të gjitha rastet hetimore që mund të jenë të ndryshme nga ato që janë të parashikuara nga germa “a” e këtij neni. Në situatën e fundit mjafton të plotësohet kushti i pamundësisë apo vështirësisë së marrjes së provave me mënyra të tjera ligjore.Në këtë rast përdorimi i metodës së “Dorëzimit të kontrolluar” synon zbulimin e veprës penale dhe marrjen e provave, pasi autoriteti gjyqësor procedues nëpërmjet hetimeve të nisura, nuk ka arritur të mbledhë të dhënat e nevojshme për të identifikuar qartësisht natyrën e plotë të ngarkesës së paligjshme që do të transportohet. Për natyrën e paligjshme të ngarkesës, ekziston vetëm dyshimi i ngritur nga autoriteti procedues gjyqësor, i mbështetur në disa të dhëna të cilat nuk janë të mjaftueshme për të konkluduar mbi llojin dhe natyrën e paligjshmërisë së ngarkesës që do të transportohet.
    29. Në ndryshim nga situata e parashikuar nga neni 294/c, paragrafi i dytë, germa “a” i Kodit të Procedurës Penale, ku përdorimi i metodës së “Dorëzimit të kontrolluar” shërben për identifikimin, arrestimin e personave të përfshirë në veprimtari kriminale, në rastin e parashikuar nga germa “b” kjo metodë shërben për të zbuluar veprën penale dhe për të marrë provat e nevojshme kur me përdorimin e veprimeve të tjera hetimore rezultati bëhet i pamundur ose i vështirë për t’u realizuar.
    30. Parashikimi në ligj i rasteve të përdorimit të metodës së “Dorëzimit të kontrolluar”. Përcaktimi i natyrës së veprave penale ndaj të cilave është lejuar me ligj kryerja e veprimit të“Dorëzimit të kontrolluar” të përmendur më lart merr një rëndësi të veçantë, për shkak të ndërhyrjes që organet e hetimit bëjnë në jetën dhe veprimtarinë e përditshme private të personave ndaj të cilëve kryhet ky veprim, në të drejtat e tyre të pronësisë së sendeve etj. Kjo ndërhyrje është e parashikuar në ligj dhe lejohet vetëm për një kategori të caktuar veprash penale që gjithashtu janë të parashikuara në ligj. Në këtë mënyrë,neni 294/c i Kodit të Procedurës Penalepërmbush kriterin epërcaktueshmërisë (parashikueshmërisë) në ligj të përdorimit të metodës sëdorëzimit të kontrolluar dhe të veprave penale për të cilat lejohet kryerja e tyre.
    31. Autorizimi, kontrolli dhe mbikëqyrja e veprimit të “Dorëzimit të kontrolluar”. Metoda e “Dorëzimit të kontrolluar” ruan të njëjtat veçori të përmendura edhe për metodat e “Veprimeve simuluese” dhe “Infiltrimin në përbërje të grupit kriminal”. Dorëzimi i kontrolluar nuk përfshihet në kategorinë e veprimeve që mund të kryhen me iniciativën e policisë gjyqësore. Arsyet mbështeten te natyra e veçantë e metodave të posaçme të hetimit të cilat janë ndërhyrje në privatësinë e personave të përfshirë më parë në hetim. Përdorimi i metodës së“Dorëzimit të kontrolluar” është i pranueshëm dhe i lejueshëm nga ligji vetëm në rastet kur në balancim të këtij veprimi ekzistojnë mekanizma ligjor që parashikojnë masa konkrete mbrojtëse për të ndaluar abuzimet e mundshme që vijnë si rezultat i përdorimit të metodave të posaçme të hetimit nga ana e policisë gjyqësore.

     

    32. Mbështetur në jurisprudencën e GJEDNJ-së në lidhje me këtë temë, themi se ligji për lejimin e përdorimit të metodave të posaçme të hetimit, duhet të përcaktojë në veçanti një procedurë të qartë dhe të parashikueshme për autorizimin, zbatimin dhe mbikëqyrjen e metodave të posaçme të hetimit^[3]. Si autoritetet e mundshme që mund të kontrollojnë “operacionet policore në mbulim”, GJEDNJ-ja ka theksuar se ndërsa shqyrtimi gjyqësor i tyre mbetet gjithmonë mjeti më i përshtatshëm i kontrollit, mjetet e tjera që mund të përdoren ndaj këtyre operacioneve janë mjetet e mbikëqyrjes së tyre nga ana e prokurorisë përgjatë kohës kur ato janë lejuar të kryhen si veprime^[4].

     

    33.Paragrafi i tretë, i katërt, i pestë dhe i gjashtë i nenit 294/c i Kodit të Procedurës Penaleështë mbështetur pikërisht në jurisprudencën e GJEDNJ-së në lidhje me përcaktimin e autoritetit përgjegjës që do të realizojë lejimin, kontrollin dhe mbikëqyrjen e metodave të posaçme të hetimit përpara dhe gjatë zbatimit të tyre. Kjo dispozitë procedurale ngarkon prokurorin që kontrollon hetimin për të autorizuar, kontrolluar dhe mbikëqyrur kryerjen e veprimit të “Dorëzimit të kontrolluar”. Në këtë kuptim mund të themi se “Dorëzimi i kontrolluar” si pjesë e metodave të posaçme të hetimit nuk mund të krijohet dhe nuk mund të realizohetnga policia gjyqësore pa autorizimin e prokurorit. Dorëzimi i kontrolluar urdhërohet nga prokurori në kushtet e përcaktuara prej tij në autorizimin e arsyetuar për këtë qëllim. Më pas, dorëzimi i kontrolluar si metodë hetimi vihet në ekzekutim nga policia gjyqësore sipas kushteve të përcaktuara nga prokurori, i cili është përgjegjës për kontrollin dhe mbikëqyrjen gjatë realizimit të metodës së “Dorëzimit të kontrolluar”.

     

    34. Bashkëpunimi i prokurorisë me autoritetet e huaja.Metoda e “Dorëzimit të kontrolluar”është pjesë e instrumenteve të bashkëpunimit në fushën penale midis dy ose më shumë autoriteteve gjyqësore që i përkasin vendeve të ndryshme. “Dorëzimi i kontrolluar” si metodë e posaçme e hetimit krijon mundësinë e bashkëpunimit midis autoriteteve të huaja gjyqësore me qëllim zbulimin e provave dhe identifikimin e autorëve pjesëmarrës në veprat penale me natyrë transnacionale. Në këtë kuptim, për realizimin e zbatimit të metodës së “Dorëzimit të kontrolluar” paraprakisht duhet të merret pëlqimi i autoriteteve të huaja për t’u përfshirë në këtë bashkëpunim.

     

    35. Në vendin tonë, prokuroria është autoriteti i vetëm procedues i ngarkuar nga ligji që vendos përdorimin ose jo të metodës së “Dorëzimit të kontrolluar” si një veprim hetimor në hetimin e një çështje penale. Asnjë subjekt tjetër, duke përfshirë edhe policinë gjyqësore nuk është i autorizuar nga ligji për të vendosur lejimin e përdorimit të metodës së “Dorëzimit të kontrolluar” si veprim hetimor.

     

    36. Prokurori që drejton hetimin e një vepre penale me natyrë transnacionale, përpara se të autorizojë zbatimin e metodës së “Dorëzimit të kontrolluar” duhet të sigurohet se autoriteti i huaj ka dhënë pëlqimin për të bashkëpunuar për vijimin e hetimit të veprës penale të shtrirë në hapësirën e dy vendeve pjesëmarrëse në këtë bashkëpunim. Pëlqimi i autoritetit të huaj i pasqyruar në një akt të shkruar duhet të përfshijë dy kushte ligjore:

     

    • Së pari, autoriteti i huaj duhet të japë pëlqimin që sendet e paligjshme apo të dyshimta të hyjnë, të kalojnë tranzit apo të dalin nga territori i tij;
    • Së dyti, autoriteti i huaj duhet të garantojë mbikëqyrjen e vazhdueshme të hyrjes, kalimit tranzit apo daljes së sendeve nga territori i tij.

     

    37. Plotësimi i dy kushteve ligjore të përmendura më lart nga autoriteti i huaj e detyrojnë prokurorin që të urdhërojë kryerjen e veprimit të “Dorëzimit të kontrolluar”. Pushteti diskrecional i prokurorit shtrihet vetëm në vlerësimin e plotësimit të dy kushteve ligjore nga ana e autoritetit të huaj. Nëse të dy kushtet ligjore janë përmbushur dhe plotësuar nga autoriteti i huaj, atëherë prokurori është i detyruar të veprojë me nxjerrjen e urdhrit që autorizon dorëzimin e kontrolluar. Veprimet e hyrjes, kalimit tranzit apo daljes nga territori i huaj i referohen elementeve të veprës penale me natyrë transnacionale që janë importimi, tranzitimi apo eksportimi i sendeve të paligjshme apo të dyshimta të cilat janë përmendur më lart.Në pëlqimin e dhënë, autoritetet e huaja gjyqësore duhet të garantojnë vëzhgimin e vazhdueshëm dhe kontrollin e sendeve në territorin e tij.

     

    38. Autoriteti i huaj që bashkëpunon në realizimin e metodës së “Dorëzimit të kontrolluar” është autoritet gjyqësor. Komunikimet e ndërsjella midis autoritetit gjyqësor shqiptar dhe autoritetit gjyqësor të huaj në përdorimin e përbashkët të metodës së dorëzimit të kontrolluar mund të realizohen duke përdorur aktualisht nëse është e mundur dispozita ligjore e“Protokollit të Dytë Shtesë të Konventës së Këshillit të Evropës për Ndihmën e Ndërsjellë Juridike në Fushën Penale”, i cili është ratifikuar nga Kuvendi i Shqipërisë me ligjin nr. 8883, datë 18.4.2002.Referuar nenit 4, paragrafi i katërt i këtij Protokolli Shtesë, kërkesat për ndihmë reciproke bazuar në dorëzimin e kontrolluar që është parashikuar në nenin 18 të këtij Protokolli, mund të nisen direkt nga autoritetet kompetente të Palës kërkuese tek autoritetet kompetente të palës së kërkuar. Për shkak të urgjencës dhe dinamikës së hetimit, është e kuptueshme që Protokolli i Dytë shtesë i Konventës, mundëson komunikimin e autoriteteve kompetente reciproke direkt me njëri-tjetrin me mjete të shpejta komunikimi me qëllimin e mirë që hetimit të përbashkët të mos t’i shkaktohen vonesa në kohë.

     

    39. Është e kuptueshme se shqyrtimii çështjeve që i referohen rastit të “Dorëzimit të kontrolluar” në Protokollin e Dytë shtesë të Konventës së cituar më lart, nuk ka qenë në objektin e tij, përfshirja e bashkëpunimittë mirëfilltë policor apo i rrugëve të tjera të bashkëpunimit jo-gjyqësor. “Dorëzimi i kontrolluar” në këtë Protokoll, ështëvlerësuar nga hartuesit sinjë formë e ndihmës së ndërsjellë juridike në fushën penale në të cilën bashkëpunojnë vetëm autoritetet gjyqësore të shteteve anëtare.

     

    40. Përmbajtja e urdhrit të prokurorit që autorizon “Dorëzimin e kontrolluar. Urdhri i Prokurorit që autorizon përdorimine metodës së dorëzimit të kontrolluar duhet të përmbajë:

     

    • Emrin e të dyshuarit ose të pandehurit nëse ai është evidentuar gjatë hetimit.
    • Provat që vërtetojnë natyrën e paligjshme të sendeve që duhet të hyjnë, kalojnë tranzit apo dalin nga territori i shtetit.
    • Përshkrimin e mënyrës sipas së cilës do të realizohet kontrolli ose mbikëqyrja e sendeve.

     

    41. Në autorizimin e lëshuar prokurori mund të urdhërojë zëvendësimin e pjesshëm ose të plotë të sendeve të paligjshme duke përcaktuar edhe vendin e ruajtjes së kampioneve të marra. Siç e kemi përmendur edhe më lart, jo në të gjitha rastet prokurori është i detyruar të urdhërojë zëvendësimin e sendeve të paligjshme. Zëvendësimi i sendeve të paligjshme mund të urdhërohet nga prokurori në rast kur ai e vlerëson se gjatë përdorimit të metodës së “Dorëzimit të kontrolluar”, sendet për shkak të natyrës së tyre ose për shkak të kompleksitetit të hetimit të çështjes, mund të humbasin ose të dëmtohen.
    42. Urdhri i prokurorit për përdorimin e metodës së “Dorëzimit të kontrolluar” zbatohet nga policia gjyqësore. Edhe në këtë rast, prokurori ka një rol të rëndësishëm në raport me përdorimin e metodës së “Dorëzimit të kontrolluar”. Paragrafi i gjashtë i nenit 294/c i Kodit të Procedurës Penale, e ngarkon prokurorin me detyrimin për të kontrolluar dhe mbikëqyrur veprimet e policisë gjyqësore në zbatim të urdhrit të tij për përdorimin e metodës së “Dorëzimit të kontrolluar”. Veprimi i “Dorëzimit të kontrolluar” shoqërohet me pajiset elektronike gjurmuese dhe kur është rasti me regjistrime bisedash, foto ose filmime të cilat duhet të pasqyrohen në autorizimin e lëshuar nga prokurori. Të gjitha masat e përmendura më lart, janë në funksion të kompetencës ligjore të prokurorit për të autorizuar, kontrolluar dhe mbikëqyrur përdorimin e metodës së “Dorëzimit të kontrolluar”. Në këtë aspekt mund të themi se neni 294/c, paragrafi i gjashtë i Kodit të Procedurës Penaleështë shprehje e kriterit të kontrollit të prokurorit në drejtim të kryerjes së veprimit hetimor të “Dorëzimit të kontrolluar”.

     

    [1]Pika e 13 e Udhëzimit të Përbashkët “Për përdorimin e metodave speciale kundër krimeve të drogës” të hartuar në bashkëpunim midis Prokurorisë së Përgjithshme dhe Ministrisë së Rendit Publik, datë 11.4.2003.

    [2]Gjykata e shkallës së parë “Për Krimet e Rënda” Tiranë, vendimi nr. 21, datë 19.4.2011.

    [3]Gjykata Evropiane “Për të Drejtat e Njeriut dhe Liritë Themelore” (Dhoma e Madhe) Ramanauskas kundër Lituanisë,nr. i aplikimit74420/01, datë 5.2.2008, paragrafi 51.

    [4]Gjykata Evropiane “Për të Drejtat e Njeriut dhe Liritë Themelore” Banninkova kundër Rusisë,nr. i aplikimit18757/06, datë 4.11.2010, paragrafi 50.

  • Konteksti historik
    43. “Dorëzimi i kontrolluar” është pjesë e metodave të posaçme të hetimit që përdoret gjatë hetimeve paraprake, nëpërmjet të cilave prokuroria dhe policia gjyqësore në bashkëpunim me njëra-tjetrën synojnë të mbledhin prova të mjaftueshme në drejtim të ekzistencës së veprës penale si dhe identifikimin e autorëve të saj. Me anë të përdorimit të metodës së “Dorëzimit të kontrolluar” të parashikuar në ligj, shteti përmbush një nga detyrimet kushtetuese që i referohet ruajtjes dhe sigurisë së rendit publik dhe mbrojtjes së marrëdhënieve të rëndësishme shoqërore në drejtim të luftës kundër krimeve të rënda. “Dorëzimi i kontrolluar” i parashikuar nga neni 294/c i Kodit të Procedurës Penale, në ndryshim nga metodat e tjera të posaçme të hetimit, kërkon bashkëpunimin e autoriteteve gjyqësore shqiptare me autoritetet e huaja gjyqësore. Në këtë kuptim, metoda e “Dorëzimi të kontrolluar” është një instrument bashkëpunimi në fazën e hetimit me autoritetet gjyqësore të huaja.
    44. Nevoja dhe detyrimi për të përmirësuar më tej metodat e hetimit si pasojë e kompleksitetit dhe rrezikshmërisë në rritje që ka pësuar krimi në përgjithësi, e ka orientuar shtetin për të krijuar modele të reja që i shërbejnë luftës kundër fenomeneve kriminale që rrezikojnë marrëdhëniet shoqërore. Kur përmendim fenomenet kriminale kemi parasysh sjelljet njerëzore që shkaktojnë një ndikimi të theksuar negativ për shoqërinë. Sjellje të tilla me pasoja të rënda kriminale përfaqësohen nga veprat penale në fushën e narkotikëve, veprat penale në fushën e tregtimit në kundërshtim me ligjin e armëve, veprat penale në fushën e pastrimit të produkteve të veprës penale etj. Këto vepra penale mbartin rrezikshmëri të theksuar shoqërore për shkak të pjesëmarrjes së një numri jo të vogël personash në realizimin e tyre, për shkak të shtrirjes në kohë dhe në hapësirë të këtyre veprave që jo domosdoshmërish fillojnë dhe përfundojnë në territorin e një shteti të vetëm. Pikërisht, përdorimi i metodës së posaçme të “Dorëzimit të kontrolluar” të parashikuar nganeni 294/c i Kodit të Procedurës Penalei referohet veprave penale me natyrë transnacionale.
    45. Pasojat negative të shkaktuara nga fenomenet kriminale të përmendura më lart, për shkak të shtrirjes dhe përhapjes së tyre në shumë shtete të ndryshme, kanë vënë në lëvizje Organizatën e Kombeve të Bashkuara për miratimin e “Konventës së Kombeve të Bashkuara Kundër Krimit të Organizuar Ndërkombëtar”,e cila është ratifikuar edhe nga Kuvendi i Shqipërisë me ligjin nr. 8920, datë 11.7.2002. Kjo Konventë inkurajon shtetet palë të saj të lejojnë përdorimin e metodave të veçanta hetimore siç mund të jenë mbikëqyrja elektronike ose forma të tjera të saj, operacionet e mbuluara në luftën kundër krimeve të parashikuara në nenin 2 të kësaj Konvente. E vlerësojmë me rëndësi përmendjen e nenit 2 të kësaj Konvente pasi kjo dispozitë ligjore në pikën katër të saj i referohet konkretisht metodës së “Dorëzimit të kontrolluar” si një instrument i rëndësishëm bashkëpunimi që mund të përdoret nga autoritetet gjyqësore të shteteve të ndryshme në luftën e përbashkët kundër veprave penale që pasojat e tyre i shtrijnë në disa vende të ndryshme.
    46. Është një fakt i ditur dhe i pranuar tashmë se krimi i organizuar nuk njeh kufij dhe pengesa, prandaj mënyra më efikase në këtë luftë është bashkëpunimi ndërkombëtar midis shteteve. Pikërisht, për këtë arsye, Konventa e OKB-së, i kushton një rëndësi shumë të madhe këtij bashkëpunimi të zgjeruar ndërkombëtar midis shteteve për ta bërë më efektive luftën e përbashkët kundër krimeve me natyrë ndërkombëtare. Jo pa qëllim Konventa në mënyrë specifike i nxit shtetet të përdorin metodën e “Dorëzimit të kontrolluar”, si një instrument bashkëpunimi në luftën e përbashkët kundër krimit të organizuar.
    47. Për herë të parë metoda e “Dorëzimit të kontrolluar” është parashikuar në legjislacionin tonë të brendshëm në ligjin nr. 8750, datë 26.3.2001, “Për parandalimin dhe luftën ndaj trafikut të substancave narkotike dhe psikotrope”. Miratimi i këtij ligji në atë kohë merrte një rëndësi të veçantë, pasi në përmbajtjen e tij pasqyroheshin për herë të parë llojet e metodave të posaçme të hetimit që mund të përdoreshin si instrumente shtesë nga organet e hetimit në luftën kundër veprave penale në fushën e lëndëve narkotike. Miratimi i këtij ligji në vitin 2001 ishte i ndikuar nga situata e përhapjes së theksuar që morën veprat penale në fushën e narkotikëve. Ky ligj përkufizoi juridikisht se cilat janë metodat e posaçme të hetimit, cilat janë subjektet përgjegjëse që duhet të veprojnë me këto instrumente në luftën kundër veprave penale në fushën e narkotikëve, si dhe mënyrën e përdorimit të tyre.
    48. Metoda e “Dorëzimit të kontrolluar” e parashikuar në ligjin “Për parandalimin dhe luftën ndaj trafikut të substancave narkotike ose psikotrope” të vitit 2001 ndikoi ndjeshëm në përmirësimin e cilësisë së hetimit të veprave penale në fushën e narkotikëve. Me përdorimin e kësaj metode janë hetuar dhe gjykuar në Gjykatën për Krimet e Rënda në disa procese gjyqësore autorë të veprave penale të trafikimit të narkotikëve si në rastin kur lënda narkotike importohej (futej) në territorin tonë ashtu edhe në rastin kur lënda narkotike eksportohej (nxirrej) jashtë territorit tonë. Kjo metodë është përdorur fillimisht për hetimin dhe gjykimin e veprave penale në fushën e narkotikëve, ndërkohë që përdorimi i saj është i efektshëm edhe në hetimin e veprave të tjera penale, si trafikimi i armëve dhe municioneve luftarake, pastrimi i produkteve që rrjedhin nga vepra penale etj.
    49. Me ndryshimet e mëvonshmeligjore që ka pësuar Kodi i Procedurës Penale me ligjin nr. 35/2017, datë 30.3.2017 u shtua një dispozitë e re ligjore,neni 294/cqë parashikon “Dorëzimin e kontrolluar” si pjesë e metodave të posaçme të hetimit. Parashikimi i përdorimit të metodës së “Dorëzimit të kontrolluar” në Kodin e Procedurës Penale me ligjin nr. 35/2017 merr një rëndësi të veçantë si në aspektin ligjor ashtu edhe në atë praktik.Me parashikimet e fundit ligjore, metoda e “Dorëzimit të kontrolluar” nuk kufizohet në përdorimin e saj vetëm në veprat penale në fushën e narkotikëve, por ajo mund të zbatohet edhe për vepra të tjera penale natyra e të cilave është përmendur më lart.
    50. Metoda e “Dorëzimit të kontrolluar” është shoqëruar me garanci procedurale të mjaftueshme të parashikuara në ligjin e brendshëm, për të siguruar që ato nuk do të përdoren në mënyrë arbitrare, të paparashikueshme dhe të pakontrolluar. Parimet e parashikueshmërisë dhe kontrollit në drejtim të përdorimit të metodës së “Dorëzimit të kontrolluar”të përfshira në nenin 294/c të Kodit të Procedurës Penalekanë qenë pjesë e trajtimit të kësaj dispozite procedurale në komentin e mësipërm.
  • Legjislacioni ndërkombëtar

    “Konventa e Kombeve të Bashkuara kundër Krimit të Organizuar Ndërkombëtar”, e cila është ratifikuar edhe nga Kuvendi i Shqipërisë me ligjin nr. 8920, datë 11.7.2002

    Neni 2, pika katër e kësaj Konvente parashikon se:

    4. “Vendimet për ushtrimin e kontrollit të dërgesave të kontrolluara në nivel ndërkombëtar mund të përfshijnë metoda të tilla, si interceptimin ose lejimin e mallrave të kalojnë të paprekura ose të hiqen apo zëvendësohen tërësisht ose pjesërisht me pëlqimin e Shteteve Palë të interesuara”.

    Neni 20, paragrafi i parë i kësaj Konvente parashikon se:

    1. Në rast se lejohet nga parimet themelore të sistemit ligjor të brendshëm, çdo Shtet Palë duhet të marrë masat përkatëse për të lejuar përdorimin e duhur të dërgesave të kontrolluara dhe në rast se është e domosdoshme të teknikave të tjera të veçanta hetimore, siç është mbikëqyrja elektronike ose forma të tjera të saj dhe operacionet e mbuluara, brenda mundësive të tij dhe sipas kushteve të përcaktuara nga legjislacioni i tij i brendshëm.

    “Protokolli i Dytë Shtesë i Konventës së Këshillit të Evropës për Ndihmën e Ndërsjellë Juridike në Fushën Penale”, i cili është ratifikuar nga Kuvendi i Shqipërisë me ligjin nr. 8883, datë 18.4.2002.

    Neni 4, paragrafi i katërt i këtij Protokolli parashikon se:

    4. Kërkesat për asistencë reciproke, të bazuara në nenet 18, 19 të Protokollit të Dytë Shtesë të kësaj Konvente, mund të nisen direkt nga autoritetet kompetente të Palës kërkuese tek autoritetet kompetente të Palës së kërkuar.

    Neni 18 i këtij Protokolli parashikon se:

    1. Çdo Palë merr përsipër të sigurojë që, pas kërkesës së një Pale tjetër, dorëzimet e kontrolluara mund të lejohen në territorin e saj në kuadrin e investigimeve penale mbi krimet e ekstradueshme.
    2. Vendimi për të kryer dorëzime të kontrolluara do të merret sipas çdo rasti nga organet kompetente të Palës së kërkuar, duke marrë parasysh të drejtën kombëtare të asaj Pale.
    3. Dorëzimet e kontrolluara do të bëhen në përputhje me procedurat e Palës së kërkuar. Kompetenca për të vepruar, drejtuar dhe kontrolluar operacionet do të jetë mbi organet kompetente të asaj Pale.
    4. Në kohën e firmosjes ose depozitimit të instrumentit të tyre të ratifikimit, pranimit,aprovimit ose hyrjes, me anë të një deklarate të drejtuar Sekretarit të Përgjithshëm të Këshillit të Europës, Palët do të përcaktojnë organet që janë kompetente sipas këtij neni. Ato mund, në çdo kohë dhe në të njëjtën mënyrë, të ndryshojnë kushtet e deklaratës së tyre.
• Standarde ndërkombëtare/ Referenca ndërkombëtare/ Shembuj nga praktikat më të mira

  Vendime të Gjykatës Evropiane Për të Drejtat e Njeriut

  Ramanauskas kundër Lituanisë,nr. i aplikimit 74420/01, datë 5.2.2008.

  Banninkova kundër Rusisë,nr. i aplikimit 18757/06, datë 4.11.2010.

   

   

• Materiale legjislative
  Asnjë koment
• Dispozita të lidhura

  Kodi i Procedurës Penale miratuar me ligjin nr. 7905, datë 21.3.1995, ndryshuar me ligjet nr. 7977, datë 26.7.1995; nr. 8027, datë 15.11.1995; nr. 8180, datë 23.12.1996; nr. 8460, datë 11.2.1999; nr. 8570, datë 20.1.2000; nr.8602, datë 10.4.2000; nr. 8813, datë 13.6.2002;nr.9085, datë 19.6.2003; nr. 9187, datë 12.2.2004; nr. 9276, datë 16.9.2004; nr. 9911, datë 5.5.2008; nr. 10 054, datë 29.12.2008; nr. 145/2013, datë 2.5.2013; nr. 21/2014, datë 10.3.2014; nr.99/2014, datë 31.7.2014; nr. 35/2017, datë 30.3.2017.

   

  Neni294/a, 294/b, 294/c.

   

  Kodi Penal miratuar me ligjin nr. 7895, datë 21.1.1995, ndryshuar me ligjet nr. 8175, datë 23.12.1996; nr. 8204, datë 10.4.1997; nr. 8279, datë 15.1.1998; nr.8733, datë 24.1.2001; nr. 9017, datë 6.3.2003; nr. 9030, datë 13.3.2003; nr. 9086, datë 19.6.2003; nr. 9188, datë 12.2.2004; nr. 9275, datë 16.9.2004; nr. 9686, datë 26.2.2007; nr. 9859, datë 21.1.2008; nr. 10 023, datë 27.11.2008; nr. 23/2012, datë 1.3.2012; nr. 144, datë 2.5.2013; nr. 98, datë 31.7.2014; nr. 176/2014, datë 18.12.2014; nr. 135/ 2015, datë 5.12.2015; nr. 82/2016, datë 25.7.2016; nr. 36/2017, datë 30.3.2017; nr. 89/ 2017, datë 22.5.2017vendimet e Gjykatës Kushtetuese: nr. 13, datë 29.5.1997; nr. 46, datë 28.8.1997; nr. 58, datë 5.12.1997; nr. 65, datë 10.12.1999; nr. 11, datë 2.4.2008; nr. 19, datë 1.6.2011; nr. 47, datë 26.7.2012 dhe nr. 9, datë 26.2.2016;

   

  Neni128/a, 141/a, 234, 278, 278/a, 282, 282/a, 283, 283/a, 287, 294/c, 298.

   

  Ligji nr. 8750, datë 26.3.2001, “Për parandalimin dhe luftën ndaj trafikut të substancave narkotike ose psikotrope”.

   

  Nenet 2, 13, 14, 15.

• Akte nënligjore

   

  Udhëzimi i përbashkët i Prokurorisë së Përgjithshme dhe Ministrisë së Rendit Publik datë 11.4.2003, “Për përdorimin e metodave speciale të hetimit”.

   

• Vendime

  Vendime të Gjykatës së shkallës së parë “Për Krimet e Rënda” Tiranë

  Vendimi nr. 21, datë 19.4.2011.

• Bibliografia
  Asnjë koment
• Arkiva
  Asnjë koment